Gjykatësja gjermane përqesh Kur’anin dhe myslimanët

FRANKFURT – Opinioni gjerman, javën e kaluar, reagoi ndaj gjykimit të një gjykatëse në gjykatën e Frankfurtit, e cila dhunën në një familje myslimane nuk e morri si arsye për shkurorëzimin e qiftit bashkëshortor duke u arsyetuar se sipas Kur’anit burrit i lejohet rrahja e gruas.

“Në momentin kur Kur’anit i jepet përparësi para Kushtetutës gjermane, lirisht mund të themi: Gjermani, natën e mirë”, deklaroi sekretari i përgjithshëm i unionit krishterë demokratik në pushtet (CDU), Ronald Pfalla. “Gjykimet në gjykatën gjermane shqiptohen në emër të popullit, e jo në emër të Kur’anit, përfundoi Pofalla.

Partia Socialdemokrate kërkoi që gjykatësja në fjalë të pushohet menjëherë nga puna.

Gjykatësja nga Frankfurti, e cila ndërkohë “për shkak të njëanësisë” është larguar nga rasti, refuzoi kërkesën e një marokene e cila kishte kërkuar shkurorëzim sipas procedurës së shpejtë për shkak të keqtrajtimit nga bashkëshorti i saj, gjithashtu maroken.

Gjykatësja, përkundër fakteve që gjykata bashkëshortit ia kishte ndaluar t’i afrohet gruas, morri vendim për mosshkurorëzim sepse, siç tha ajo, sipas Kur’anit “lejohet rrahja e gruas”, andaj nuk ka arsye për shkurorëzim.

Eksperti demokristian i drejtësisë Wolfgang Bosbach shprehi shqetësim për futjen e disa zakoneve dhe koncepteve të cilat nuk i përshtaten konceptit të shoqërisë perëndimor.

Organizata për mbrojtjen e të drejtave të gruas "Terre des Femmes" kritikoi sjelljen e gjykatëses nga Frankfurti duke i parë faktet për dukurinë shumëvjeçare të tolerancës së shtrembëruar ndaj kulturave dhe zakoneve tjera.

“Shumë qytetarë frikohen se mund të karakterizohen si racistë apo kundërshtar të islamit prandaj verbërisht tolerojnë disa dukuri sikur dhuna ndaj gruas etj”, tha presidentja e "Terre des Femmes" Christa Stolle.

Feministja e njohur gjermane Alice Schwarzer shprehi shqetësim për shkak të dukurive në gjykatën gjermane të cilat kinse nga kujdesi për zakonet e kulturave tjera shpeshherë prodhojnë vendime të lehta apo të pafajshme.

Këshilli qendror i myslimanëve në Gjermani dënoi sjelljet e gjykatëses nga Frankfurti dhe konstatuan se edhe sipas parimeve islame dhuna kundër mashkullit apo femrës është argument për shkurorëzim.

burimi: www.islamgjakova.net