Mbreti Abdullah para Kongresit amerikan kërkoi zgjidhje për

Mbreti i hashemitëve – Abdullah qëndroi në foltoren e dy dhomave të Kongresit amerikan si dikur babai i tij, mbreti Hysein. Ai e mori si obligim të mos heshtë dhe të jetë transparent. Jo lufta në Irak, por mungesa e drejtësisë për palestinezët është që nuk i flenë në zemër. Mbreti jordanez Abdullah tha: «Si mik i Amerikës më duhet t’ju them se procesi paqësor i Lindjes së afërt është problemi më i madh, jo vetëm për vendin tonë, por edhe për vendet tjera të regjionit.» Askush në Kongres nuk u duartrokiti këtyre fjalëve. Para nisjes për në Amerikë, mbreti Abdullah deklaroi se Izraeli duhet të vendosë, çfarë dëshiron, fqinjësi, me të cilin mund të jetoj në paqe dhe siguri apo kështjellë. Prandaj para Kongresit amerikan ai tha: «Muslimanët në mbarë botën pyeten si është e mundshme që palestinezët ende jetojnë pa shtet, pa infrastrukturë. A mendon Perëndimi seriozisht kur flet për drejtësinë, barazinë dhe respektimin e të drejtave njerëzore.»

Janë raste të rralla kur një mysafir i huaj, pa qime në gjuhë, flet para Kongresit amerikan. Mbreti Abdullah ishte kundër luftës në Irak, e që më vonë me heshtje përkrahu Amerikën dhe përfitoi. Ekonomia në Jordani është duke lulëzuar. Për çdo vit ky vend merr gjysmë milion dollarë amerikan ndihmë nga fondet e ndryshme për zhvillim. Ndihmë më të madhe se Jordani merr vetëm Izraeli. Krahas këtyre, Amerika duhet t’i dyfishoj përpjekjet dhe të gjejë një zgjidhje paqësore mes Izraelit dhe Palestinezëve, tha mbreti Abdullah dhe shtoi: «Zgjidhja paqësore, e cila jep rezultate, por jo për vitin tjetër, apo për pesë vitet e ardhshme, por për këtë vit.»

Pas këtyre fjalëve pasoi duartrokitja e kongresmenëve amerikan drejtuar mbretit të ri jordanez, i cili mori guxim dhe fjalimin e tij e përfundoi me fjalët: «Lërini palestinezët, irakianët, izraelitët të jetojnë në paqe. Ndihmoni në ndërprerjen e gjakderdhjes dhe vrasjen e njerëzve të pafajshëm.»

Kjo ishte vizita e 20-të zyrtare e mbretit jordanez në Shtetet e Bashkuara. Por e para, në të cilën mbreti Abdullah haptas foli për krizën në Lindjen e afërt.

burimi: www.islamgjakova.net